Dili, 2 Outubru 2024, Rede Feto Timor-Leste (RFTL) asina akordu ho Uniaun Europeia hodi atribui fundus ba suporta realizasaun Konferénsia Munisipal Feto no VI Kongresu Nasionál Feto Timor-Leste. RFTL hetan mandatu no lezitimidade atu lidera, organiza no fasilita Kongresu Nasionál Feto Timor-Leste ne’ebe hala’o kada tinan hat (4). Apoiu ne’e hanesan komprimisiu husi EU nian ba promove igualdade jéneru no empoderamentu feto iha Timor-Leste.

Hanesan iha diskursus Sr. Christoph Sorg, Adjuntu Xefe Misaun Uniaun Europeia iha Timor-Leste hateten katak “Ami ho orgullu halo parseria ho Rede Feto iha luta ne’ebé la’o daudaun ba igualdade jéneru no empoderamentu feto iha Timor-Leste. Ida-ne’e tenke inklui konsulta regulár ba feto sira iha sira-nia reprezentasaun ne’ebé luan liu, atu informa sira nune’e mós atu hetan informasaun husi sira. Aspetu xave sira seluk hosi luta ida-ne'e maka sosiedade sivíl nia monitorizasaun ba dezempeñu governu nian no hadi’ak sosiedade sivíl nia advokasia. Rede Feto ho nia membru sira iha pozisaun ideál atu hala'o knaar importante sira-ne'e”.

“Ami apresia tebes ho Uniaun Europeia nia suporta, hanesan ami nota katak UE iha kompromisu forte tebes ba asuntu promosaun igualdade jéneru no empoderamentu feto liuhusi apoiu oioin, hanesan Inisiativa Spotlight, empoderamentu feto no advokasia ba asuntu direitu feto. Ami ho kontente atu hatete katak apoiu husi UE signifikativu tebes ba Konferénsia Munisipal Feto iha munisípiu 13, ne’ebé sei hala’o durante semana neen no pontu ikus husi konferénsia ne’e mak Kongresu Nasionál Feto nian”, dehan Sra. Zelia Fernandes, Prezidente Konsellu Diretoria Rede Feto Timor-Leste.

Konferénsia Munisipal Feto sei hahu kinta-feira 3 Outubru 2024 iha munisipiu Baucau, no sei kontinua ba munisipiu sira seluk. Husi atividade ne’e atu apresenta rezultadu monitorizasaun Plataforma Asaun, indentifika issue sosial, liu diskusaun grupu ho área temátiku ualu hanesan Justisa, Edukasaun, Saúde, Ekonomia no Empregu, Polítika no Vida Públika, Inkluzaun Sosiál, Ambiente no Mudansa Klimátika, Integrasaun Jéneru, no mós halo identifikasaun no hili delegada feto hodi partisipa iha Kongresu Nasionál.