Abertura Treinamentu Prosesamentu Bubur Kacang Hijau

Rede Feto Timor-Leste hamutuk ho ADRA Timor-Leste liuhusi Projetu Hakbi’it Feto halo abertura ba treinamentu “Produsaun Bubur Kacang Hijau ba Grupu Liki Kosar ba Moris Di’ak (LKMD)” seremonia abertura ne’ebe rezaliza iha loron 26 fulan Juñu 2024 fatin Aldeia Hali-dolar, Suku Hera, Postu Administrativu Cristo Rei.

Treinamentu ne’e loke husi Kordenador Projetu ADRA Timor-Leste, Hendrique Gonçalves iha ninia diskursu hateten katak “Objetivu husi atividade ida ne’e atu empodera maluk feto sira, oinsa kria oportunidade servisu ba maluk feto sira atu iha rendimentu rasik, nune’e feto mós bele senti forte iha família”.

Antes atu hahu treinamentu Kordenador Projetu mós enkoraja Grupu LKMD atu akompaña no rona didiak materia sira ne’ebé fasilitador sira fó, tanba fore-mungu da’an ba família han diferente ho da’an ba ema ka konsumidór sira, presiza hare produtu nia sabor, kualidade no ijiene.

Iha fatin hanesan, Xefi Grupu LKMD, Esperança da Silva Pinto hateten katak, formasaun ne’e importante tebes ba sira nia grupu tanba durante grupu ne’e hari sira nia atividade mak kuda modo de’it, maibe ho treinamentu bele ajuda aumenta tan sira nia atividade hodi hasa’e rendimentu família nian. Nia mós hatutan tan katak, agora grupu sira nia produtu iha tos laran ne’ebé faan la folin sei la estraga ona, sira bele prosesa Fore-mungu daan ho sabor lakeru, Hudi no fos-rai-metan.

Treinamentu ne’e fasilita husi organizasaun membru CNSR ho métodu formasaun 50% teoria no 50% prátika, fó koñesimentu utiliza ekipamentu produsaun. Durasaun treinamentu loron ida ho total partisipante grupu LKMD hamutuk na’in 20 kompostu husi feto na’in 16 no mane na’in 4.

Treinamentu ne’e realiza tanba hetan apoiu fundu husi União Europeia no Ko-Finanseiru husi Ajénsia Dezenvolvimentu Austriaka.