Organizasaun membrus Rede Feto 4 hanesan Fundasaun Esperança, Fundasaun Kolegas Da Pas, Fundasaun Haburas Moris no Centro Nossa Senhora do Rosario asina akordu parseria ho ADRA Timor-Leste, liuhusi Projetu Hakbiit Feto atu implementa Programa Eskola Kampu no Klimátika ba Agrikultór iha Munisípiu Baucau, Dili, Ainaro no Bobonaro

Country Director ADRA Timor-Leste, Sra. Virginia Pycropft liu hosi Intervensaun, Segunda feira (15 Agostu 2022) iha Salaun Enkontru RFTL hatete akordu ida-ne’e, OSS hirak-ne’e sei hetan fundus sufisiente hodi estabelese, treina, monitoriza no halo akompañamentu ba grupu Eskola Kampu no Adaptasaun Klimátika ba Agrikultór hamutuk grupu sanulu-resin-lima iha munisípiu Ainaro, Baucau, Bobonaro, no Dili iha tinan 2022.

Grupu ne’e mós sei hetan apoiu materiál báziku ba sira-nia atividade agrikultura nian, no mós hetan akompañamentu no monitorizasaun regulár hodi garante sustentabilidade husi atividade ida-ne’ebé bele hetan rendimentu. Formasaun ne’e sei inklui mós sesaun relevante sira kona-ba asuntu jéneru, prevensaun violénsia doméstika no violénsia bazeia ba jéneru. Pelumenus sistema bee rua mak sei instala iha kada munisípiu.

Hakbiit Feto mosu ho objetivu atu hametin kapasidade grupu feto Timoroan iha área pratika agrikultura di’ak no ligasaun merkadu. Formasaun ba grupu agrikultór feto sira sei foku liu ba oinsá hasa’e kuantidade no kualidade produsaun lokál ne’ebé identifika ona iha peskiza merkadu no mapamentu kadeia de valor nian, hanesan foos mean no metan, fore-rai, batar, fehuk, liis mutin & mean no produtu ortikultura sira seluk, liuhusi aproximasaun adaptasaun klimátika no konservasaun rai.

Karla da Silva Leitzke, Ofisiál Programa Uniaun Europeia nian ne’ebé responsabiliza ba asuntu Sosiedade Sivil no Jéneru Carla hateten mudansa la’o daudaun ba feto-maluk Timoroan sira. Uniaun Europeia sente haksolok tanba iha OSS haat ne’ebé hamutuk ho Projetu Hakbiit Feto hodi luta ba igualdade jéneru iha Timor-Leste. Ida-ne’e mak buat ne’ebé ita hanaran empoderamentu feto. Sei laiha buat ida kona-ba sira, se sira la hola parte.

Projetu ida-ne’e fó dalan ba feto vulneravel sira iha área rurál no Urbanu iha Timor-Leste, atu tama iha grupu relevante, atu bele foti sira-nia vida agora no futuru nian iha liman, hetan espasu ne’ebé seguru atu espresa sira-nia hanoin no planu ne’ebé bele halo sira-nia fiar aan, haforsa sira-nia abilidade sosiál no estabelese relasaun sosiál iha nivel komunidade atu hamutuk sai forte liután.

Diretora Ezekutiva RFTL Sra. Aida Exposto hatete Rede Feto Timor-Leste nia mehi atu feto hotu iha Timor-Leste atu hetan oupurtunidade hanesan hodi partisipa iha prosesu foti desizaun no dezemvolvimentu ne’ebé inkluzivu no sustentavel. Tan ne’e atu alkansa mehi ida ne’e Rede Feto nafatin presiza apoiu hosi parseiru sira.

“Ami agradese ba parseiru ADRA ne’ebé hetan apoiu hosi Uniaun Europea hodi servisu hamutuk ho Rede Feto to’o ohin loron,”.