Tersa feira, 13 Fevereiru 2024, Rede Feto Timor Leste, ekipa advokasia FONGTIL hamutuk ho Deputadu VI Lejislatura halo vizita kortezia ba Manorin sira nain 10 no ativista nain 4, kompostu husi feto nain 5 no mane nain 9 ne'ebe detein hela iha Sala detensaun PNTL tamba ejiji direitu Justisa ba situasaun Manorin sira nian.Objectivu husi Vizita kortezia Ida ne’e mak atu solidariza maluk Manorin nain sira liu liu maluk feto sira ne’ebé mos agora detein hamutuk ho mane maluk seluk iha sala detensaun PNTL Caicoli Dili.Zelia Fernandes haktuir"Ami preukupa no lamenta tebes ho atuasaun PNTL nian hodi halo agresaun fiziku hasoru Manorin sira nudar violasaun ba diretu umanus no pura violensia hasoru sidadaun sira nia direitu ba liberdade atu reklama injustisa ne'ebe manorin sira hasoru.Ami konsidera Manorin sira nudar Edukador ne'ebe ho konsiensia as la halo asaun brutalismu no anarkismu, maibe sira ba Ministeriu Edukasaun apenas husu klarifikasaun no justifikasaun e tamba sa sra. Ministra la sai?" Prezidenti RFTL hatutan 'ami hanoin nudar feto, inan no edukadora da familia husu ba Ministra Edukasaun tenki tau konsidersaun ba situasaun Manorin sira ne’e no husu atu buka solusaun ho fuan no kakutak malirin liu husi DIALOGU nune bele solusiona problema no situasaun nebe manorin sira hasoru" Manorin hirak ne'e PNTL kaptura iha loron Segunda dader, 12 Fevereiru 2024 iha asaun pasifika nebe hala'o iha edifisiu Ministeriu Edukasaun nian oin.