Rede Feto Timor-Leste iha loron 02 fulan Juñu 2022 realiza Asembleia Membru Annual ba tinan 2020 no 2021 ho tema "HAMUTUK HAMETIN IGUALIDADE NE'EBÉ INKLUSIVU NO SUSTENTAVEL" hodi hamosu proposta rezolusaun ida hodi demite ka hasai membrus organizasaun 7 husi Membrus Rede Feto Timor-Leste.

Organizasaun membrus hirak ne’e mak hanesan Movimentu Feto Foin Sae Timor-Leste (MOFFE-TL), Fundasaun Caucus, PRADET, Sharis Haburas Comunidade (SHC), Working Women Center Timor-Leste (WWCTL), Action For Change Foundation (ACF) no Fundasaun Moris Foun (FMF). Asemleia aprezenta proposta resolusaun hodi hakotu relasaun membru ho organizasaun sira ne tamba viola estatutu Rede Feto Timor-Leste nian. Nune, Asembleia aplika sansaun displinar tuir estatutu haruka. Resolusaun refere Pasa ho votus unanimidade.

Prezidente Konsellu Diretoria RFTL, Sra. Zelia Fernandes hatete objetivu AMA nian ida entre sira seluk mak simu membru foun no hapara ka hakotu membru organizasaun sira ne'ebe viola ka lahalo tuir estatutu. Alein ne'e realizasaun Asembleia Membru Annual ne’e bazeia ba Estatuta Rede Feto Timor-Leste, Artigu 23 kona-ba Definisaun Asembleia Membru iha oin 3: Asembleia Membru Anuál (AMA) ne´ebé hala’o tinan ida dala ida. Asembleia Jeral Membru (AJM) ne’ebe halao kada tinan haat, Asembleia Membru Extraordinaria (AME) depende ejijensia Rede feto Timor-Leste nian kualker tempu no lidera husi Konsellu Diretoria.

Iha tinan 2020 no 2021, Rede Feto Timor-Leste la konsege organiza AMA ba tinan rua tui-tuir malu tamba situasaun instablidade ne’ebé organizasaun hasoru. Tuir lolos iha tinan 2020 organiza AMA hafoin KD eleitu iha 1 Outobru 2020 lidera husi Sra. Yasinta maibe lakonsege no planea duni ona atu hala’o fali iha tinan 2021. Tamba akontese problema interna iha Rede Feto Timor-Leste ne’ebe ikus mai rezolve ho Asembleia Extraordinariu iha fulan marsu 2021 hodi hili KD foun mak ohin loron foin realiza AMA

“ Durante tinan ida liu ami hamutuk ho sekretariadu halo esforsu oioin hodi normaliza fila fali Rede Feto Timor-Leste husi tentativa oioin ne’ebe mosu. Hafoin liu husi prosesu naruk, ami hanoin katak importante tebes realiza AMA hodi bele aprzenta progresu no dezafiu sira ne’ebe RFTL hasoru iha nia implementasaun programa sira durante tinan rua nian laran no aprova fila fali planu asaun anual,” Informa Prezidente KD, Liu hosi AMA RFTL, ne’ebé realiza Sesta (02/06) iha Salaun Delta Nova, Dili

Prezidente Konsellu apresia ba membru Konsellu Diretoria Rede Feto Timor Leste hamutuk ho sekretarioadu nia esforsu tomak ba realizasaun AMA, apresia no agradedese ba laran luak Prezidensia Republika mandatu Dr. Francisco Guterres Lú Olo nian apoiu hodi implementa AMA RFTL.

Objetivu realiza AMA atu apreznta Relatóriu (Narativu no finansasa) tinan 2020 no 2021 hosi Konsellu Diretoria hodi hetan apresiasaun no aprovasaun hosi Asembleia Membru Rede Feto, Aprezenta Planu Asaun Anual 2022 hodi hetan apresiasaun no aprovasaun, Simu membru foun no hapara Membrus sira ne’ebe viola estatutu RFTL nian no aprezenta no aprova resolusaun tuir nesesidade no mos Lansamentu Dokumentus principal Rede Feto Timor-Leste nian. Rede Feto Timor-Leste fiar katak AMA hatudu rezultadu di’ak hodi tulun servisu RFTL atu responde ba misaun ne’ebe ita hotu kaer metin. Liu hosi AMA sei fo resposta ba duvida no informasaun lubun ne’ebe iha katak Rede Feto mate ona. Tan ne’e AMA sei loke spasu diskusaun fo kontribusaun no ideas hodi hametin ejistensia palel RFTL. (*)