Ministeriu das Obras Públikas, Rede Feto Timor-leste ho UN Women, Tersa feira (07/03/23) ofisialmente lansa rezultadu auditoria siguransa feto iha edifisiu Ministeriu Obras Públika no espasu públiku iha Largo Lecidere Dili nudar parte ida ba reforsa mensagen sira ba hadia seguransa no asesibilidade iha espasu Públiku.

Ministru Obras Públika, Eng. Abel Pires da Silva liu husi abertura hatoo parabens ba loron internasional feto ne’ebe monu iha loron 8 Fulan Marsu 2023 espesial ba feto Timor-Leste tomak atu kontinua luta ba asuntu igualdade jeneru.

Nudar Ministru sente onra boot ba Ministeriu das Obras Públika tanba sai kampiaun ba asuntu igualdade jeneru ne’ebé importante tebes ba sosiedade. Lideransa iha MOP hatudu sira nia partisipasaun masimu atu promove partisipasaun ema hotu iha espasu publiku. No esforsu atu fo kondisaun diak ba feto no labarik feto inklui timor oan sira hotu iha Timor-Leste.

Ministru mos deklara ona kompromisiu MOP nian atu promove igualdade jeneru no empoderamentu ba maluk defisiensia sira atu servisu hamutuk hodi halakon diskriminasaun ba feto, labarik feto no ema ho defisiensia. Hodi promove espasu publiku ne’ebé asesivel ba ema hotu ho seguru. Hametin liu tan intervensaun sira iha MOP hodi la husik ema ida iha kotuk.

Head Office UN Women Sra. Amy Nista Satyan hatete nia haksolok tebes ho Ministeriu Obras publika ne’ebé hatudu kolaborasaun diak tebes hodi servisu hamutuk ho UN Women hodi organiza aktividade ne’e hahu inisiu toó remata.

“Ministru rasik hakarak atu hamrik iha oin hodi levanta asuntu seguransa feto ba oin. Tuir Ministru katak atu hadia asuntu ne’e tenki hahu hosi uma laran. Hau haksolok tebes tanba iha ema ida ne’ebé pronto atu servisu hamutuk ba asuntu igualdade jeneru,” haktuir Sra Nista

Konsellu Diretoria Rede Feto Timor-Leste, Sra Maria Imaculada Guterres, aprezenta rezultadus no rekomendasaun sira ba Auditoria Seguransa Ba Feto (WSA) iha edifisiu Ministeriu Obras Públika ho espasu publiku iha Largu Lecidere Dili. Tanba espasu ida seguru ba feto nu’udar fatin ida-ne’ebé feto iha asesu seguru no inkluzivu ba sira-nia direitus fundamentál, informasaun, no servisus.

Partisipa iha lansamentu rezultadu no Rekomendasaun ne’e parseiru sira hanesan KOICA Timor-Leste, Sekretaria Estadu Igualdade Inkluzaun (SEII), Komisaria Komisaun Funsaun Públiku, Prezidente Autoridade Munisipiu Baucau no Sekretariu Administrasaun Munisipiu Covalima. Programa ne'e realiza tanba hetan apoiu fundus husi UN Women Timor-Leste