Ue Fó Apoiu Ba Konferénsia Munisipál Feto
Díli, 2 Outubru 2024 – Uniaun Europeia fó apoiu finanseiru ba Rede Feto Timor-Leste (RFTL), atu realiza Konferénsia Munisípiu Feto nian. Liuhusi konferénsia ne’e, RFTL sei halo konsultasaun ho feto sira iha Timor laran tomak, kona-ba oinsá atu promove igualdade jéneru no hakbiit feto iha Timor-Leste. Kontribuisaun ideia sira sei hatama iha dokumentu polítiku ida hanaran Plataforma Asaun Feto Timor-Leste, ne'ebé utiliza hodi rejista no monitoriza komprimisiu no atinjimentu sira iha promosaun igualdade jéneru no hakbiit feto, no sei lori serbisu sira advokasia nian ba lei, polítika, sistema no programa governamentais nian.
Atividade Konferénsia sei hala’o iha munisípiu hotu-hotu, no sei konklui iha Kongresu Nasionál Feto ba da-neen iha Dili. Partisipante sira sei inklui maluk feto sira hosi setór oin-oin mak hanesan agrikultura, edukasaun, empreendedorizmu, saúde, polítika, no asosiasaun feto sira-nian husi nivel aldeia, postu administrativu no mós kapitál munisípiu. Durasaun ba konferénsia loron rua iha kada munisípiu no inklui aprezentasaun rezultadu monitorizasaun Plataforma Asaun, diskusaun grupu ho área temátiku ualu hanesan Justisa, Edukasaun, Saúde, Ekonomia no Empregu, Polítika no Vida Públika, Inkluzaun Sosiál, Ambiente no Mudansa Klimátika, Integrasaun Jéneru, no mós halo identifikasaun no hili delegada feto hodi partisipa iha Kongresu Nasionál.
Rede Feto Timor-Leste nu’udar rede organizasaun ne’ebé serbisu atu promove igualdade jéneru no hakbi’it feto liuhosi advokasia, rede servisu, fortalesimentu instituisaun no hari kapasitasaun. Rede Feto hamahan organizasaun membru hamutuk 46 ne’ebé 27 sei ativu iha prestasaun servisu no halo advokasia iha munisípiu sira iha Timor-Leste.
“Ami ho orgullu halo parseria ho Rede Feto iha luta ne’ebé la’o daudaun ba igualdade jéneru no empoderamentu feto iha Timor-Leste. Ida-ne’e tenke inklui konsulta regulár ba feto sira iha sira-nia reprezentasaun ne’ebé luan liu, atu informa sira nune’e mós atu hetan informasaun husi sira. Aspetu xave sira seluk hosi luta ida-ne'e maka sosiedade sivíl nia monitorizasaun ba dezempeñu governu nian no hadi’ak sosiedade sivíl nia advokasia. Rede Feto ho nia membru sira iha pozisaun ideál atu hala'o knaar importante sira-ne'e”, dehan Sr. Marc Fiedrich, Embaixadór Uniaun Europeia nian iha Timor-Leste.
“Ami apresia tebes ho Uniaun Europeia nia suporta, hanesan ami nota katak UE iha kompromisu forte tebes ba asuntu promosaun igualdade jéneru no empoderamentu feto liuhusi apoiu oioin, hanesan Inisiativa Spotlight, empoderamentu feto no advokasia ba asuntu direitu feto. Ami ho kontente atu hatete katak apoiu husi UE signifikativu tebes ba Konferénsia Munisipal Feto iha munisípiu 13, ne’ebé sei tempu semana 6 hodi kompleta konferénsia, no pontu ikus husi konferénsia ne’e mak Kongresu Nasionál Feto nian”, dehan Sra. Zelia Fernandes, Prezidente Konsellu Diretoria Rede Feto Timor-Leste.
###
Eulalia Pereira, Ofisiál Media RFTL
Akito Ximenes, Ofisiál Press & Informasaun, Delegation Uniaun Europeia iha Timor-Leste
