Rede Feto Timor-Leste Sesta feira (19/08/2022) asina akordu parseria ho Care Internasional ba publikasaun mensajen pozitivu ba sensibilizasaun jéneru iha Revista Lafaek ba Komunidade.

Asinatura akordu parseria ne’e halao husi Diretór País CARE Internasionál iha Timor-Leste, Sr. Peter Goodfellow, no Diretora Ezekutivu Rede Feto Timor-Leste Sra. Pascoela Aida da Costa Exposto, Partisipa mós iha serimónia ne’e reprezentante Projetu Lafaek no ADRA Timor-Leste.

Diretór País CARE Internasionál iha Timor-Leste, Sr. Peter Goodfellow hatete Care Internasional nia servisu iha Timor-Leste foka liu ba dezemvolvimentu sustentavel no apoiu humanitaria ba tempu naruk nian iha projeitu sira hanesan risku dezastre, edukasaun, saude, hijiene komunitaria, reproduktivu seksual, saude Materna, partisipasaun feto no igualdade jeneru

Atu responde ba servisu hirak ne’e Care Internasional dezemvolve ona akordu parseria ho Rede Feto Timor-Leste atu fahe informasaun konaba igualdade jéneru no inkluzaun social.

Rede Feto ho Care fahe komitmentu komum hodi halo investimentu iha igualdade jéneru no inkluzaun social no hakbi ít feto. Ami kontente ho kooperasaun ida ne’e atu bele dezemvolve liu tan programa iha futuru.

Diretora ezekutiva Rede Feto Timor-Leste Sra. Aida Exposto apresia ho akordu parseria ne’e, tanba Rede Feto konsidera servisu parseria nudar pilar importante iha Rede Feto nia planu estrategiku hodi haforsa liu tan advokasia Rede Feto nian.

Parseria ida agora foka liu ba programa publikasaun iha Revista Lafaek Care Internasional nian. Rede Feto iha esperansa boot katak mensagen pozitivu ne’e sai nudar meiu Advokasia, aumesmu tempu nudar prosesu konsensializasaun no sensibilizasaun komunidade sira too baze.

Programa ne’e, Rede Feto Timor-Leste servisu hamutuk ho ADRA Timor-Leste no apoiu fundus husi Uniaun Europeia (EU) no Austrian Development Agency (ADA).