Dili, 26 Fevereiru 2025 – sorumutu ikus Projetu Hakbiit Feto, hala'o ohin iha Sala Orchid, andár 5 Timor Plaza, ne’ebe halibur parte interesada sira hodi diskute rezultadu, desafius no impaktu hosi projetu ne’ebé implementa ona durante tinan 4, hahu husi Marsu 2021 to’o Fevereiru 2025. Eventu ne’e partisipa hosi reprezentante Governu, Organizasaun Sosiedade Sivíl, Doadór, Benefisiáriu s no parseiru estratéjiku sira seluk.

Sra. Virginia Pycroft, Diretora Nasionál ADRA Timor-Leste iha nia diskursu hateten katak “Ohin oportunidade diak halibur hamutuk halo reflesaun kona-ba ita-nia atividade ne’ebé inplementa no saida mak ita hetan ona". organizasaun sosiedade sivíl mak forsa importante ba nasaun demokratiku, orgullu servisu ho organizasaun sosiedade sivíl ne’ebé programa liga liu ba asuntu feto nian ne'ebe lidera husi maluk feto sira, ne’ebé iha kbiit hatan ba desafiu ligadu ho asuntu feto nian.”

Sra. Zelia Fernandes, Prezidente Rede Feto iha ninia mensajen hateten: “Rede Feto Timor-Leste asumi papel importante atu fasilita, kordena no haforsa membru organizasaun sira. Ho papel ne’e kontenti parseria ho ADRA, durante tinan 4. Ohin laos fim husi projetu, maibe inisiu atu hatudu nafatin ita nia korajen no vontade oinsa kontinua hala’o papel sira ne’e”. Liuhosi Projetu Hakbiit Feto ne'ebe inplementa husi membru Rede Feto 8 ho grupus benefisiárius 36, kontinua servisu no asiste ho koñesimentu no abilidade ne’ebe hetan liuhosi projetu ne’e, maski projetu no akordu ho UE termina. Ita presiza tau forsa hamutuk hodi hakbiit feto barak liután hetan asesu no oportunidade hodi kontribui ba dezenvolvimentu Timor-Leste.

Embaixadór Uniaun Europeia, Sr. Marc Fiedrich, iha nia diskusu, Subliña “Ohin, ita halibur reflete kona-ba ita-nia viajen no reafirma ita-nia kompromisu atu avansa igualdade jéneru no empoderamentu ekonómiku ba feto sira iha Timor-Leste”. Projetu Hakbiit Feto “Apoia Organizasaun Sosiedade Sivíl no Feto Timor-oan sira nu’udar Ajente Markadu ne’ebé Empoderada” ne’e fundamentál atu hametin knaar feto nian iha ekonomia. Nia subliña, empodera feto sira ekonomikamente la’ós de’it hadi’a sira-nia moris maibé mós impulsiona dezenvolvimentu sira-nia família no komunidade.

Sr. Hermino, reprezenta Sekretáriu Estadu Igualdade, iha nia dikursu abertura hatete katak “Empoderamentu Feto hanesan mos programa governu nian, ne’ebe fo oportunidade ba feto sira foti desizaun, hanesan parte governu orgullu no agradese ba parseriu ne’ebé apoiu programa ne'e”.

Eventu ne’e nudar oportunidade ida ba benefisiárius fahe sira-nia esperiénsia no dezafius, hodi destaka transformasaun ne’ebé projetu ne’e lori ba sira-nia moris. Reprezentante doadór sira reafirma sira-nia kompromisu atu kontinua apoia inisiativa ne’ebé ho objetivu ba igualdade jéneru no dezenvolvimentu feto iha nasaun ne’e.

Atividade ne'e realiza tanba hetan apoiu fundu hosi União Europeia em Timor-LesteAustrian Development Agency.