Dili, 23 Marsu 2023 – Rede Feto Timor-Leste asina akordu parseria ho ADRATimor-Leste ba Planu Implementasaun Detallu Anuál (DIP) Projetu Hakbiit Feto ba tinan datoluk nian.

RFTL no ADRA TL iha parseria hodi implementa Projetu Hakbiit Feto ba tinan 2021 – 2025, ne’ebé kobre munisípiu Ainaro, Baucau, Bobonaro no Dili. Tinan-tinan, akordu parseria ne’e atualiza ho Planu Implementasaun Detallu Anuál, bazeia ba revizaun husi progresu tinan kotuk nian. Akordu ne’e sei sai nu’udar baze ba implementasaun projetu iha tinan 2023 – 2024.

Iha planu foun ida ne'e, projetu Hakbiit Feto sei implementa plataforma aprendizajen Rede Feto nian ne'ebé funsiona hodi apoia fahe informasaun, advokasia no akonsellamentu negósiu nian, nomos sei dezenvolve no defende inkluzaun jéneru no violénsia doméstika ne' ebé sei mosu iha akonselamentu pré-kazamentu nian. Ida ne'e sei hala'o liuhusi konsultasaun ne’ebé besik ho líder Igreja sira iha Dioseze Dili no Baucau.

Projetu Hakbiit Feto iha kompromisu atu empodera feto Timoroan sira sosiál no ekonomikamente liuhusi haforsa Organizasaun Sosiedade Sivil (OSS) sira ne’ebé foku ba feto sira mak hamahon aan iha sobriña Rede Feto. Projetu ne’e apoia Sekretariada Rede Feto iha área tékniku no abilidade jestaun, governasaun, no sustentabilidade organizasaun nune’e sira bele promove igualdade jéneru no empoderamentu feto iha Timor-Leste.

“Investimentu iha empoderamentu ekonómiku ba feto Timoroan nian lori ita ba hakat ida-ne’ebé signifikativu liután ba igualdade jéneru, halakon kiak no kreximentu ekonómiku inkluzivu. Tanba ne'e mak Uniaun Europeia ho orgullu apoia ADRA no Rede Feto nia esforsu konjuntu liuhusi Projetu Hakbiit Feto," dehan Embaixadór Uniaun Europeia ba Timor-Leste, Marc Fiedrich.

Projetu ida-ne’e sei nafatin empodera feto vulneravel sira iha Timor-Leste. Liuhusi prestasaun servisu ho kualidade di’ak husi OSS sira ne’ebé foku ba feto sira, feto sira bele hetan espasu seguru hodi espresa sira-nia hanoin no ideias, haforsa sira-nia abilidade sosiál no ekonómiku, ativu iha dezenvolvimentu kadeia de valor no kontribui ba sosiedade ida-ne’e forte liután. ADRA TL serbisu iha parseria ho Rede Feto Timor-Leste implementa hela projetu ida-ne’ebé, hetan apoiu finanseiru husi Uniaun Europeia, no finansia hamutuk ho Ajénsia Dezenvolvimentu Austria nian.