04-5-2023, NGO Esperansa Timor-Leste nudar membru husi Rede Feto Timor-Leste realiza atividade auditoria seguransa feto iha espasu publiku iha Munisipiu Covalima hanesan Fatin Turismu Sulo Suai Loro, Merkadu Salele, Merkadu tuan no merkadu Foun.

Administrador Postu Salele, Sr. Beneditos Maia agradese ba prezensa NGO Esperansa, Rede Feto Timor-Leste hamutuk ho parseiru sira iha munisipiu Covalima, liu-liu iha Merkadu Salele bele ajuda vendedores feto sira atu deskobre problema siguransa ne’ebé durante ne’e sira hasoru.

Kordenadora ba projeitu WSA Sra. Domingas Saldanha hatete kestaun seguransa espasu publiku hanesan merkadu, terminal, transporte publiku, jardin sira ema barak loro-loron konsentra iha ne’ebá e dala barak mos problema asediu seksual akontese iha fatin sira ne’e. Tan ne’e mak Rede Feto Timor-Leste ho apoiu husi UN Women implementa projeitu auditoria seguransa ba feto iha edifisiu publiku no espasu publiku iha Munisipiu Dili, Baucau, Covalima no RAEOA.

“Fatin sira ne’ebé sai tarjetu ba Auditoria ba seguransa feto nian ita hare liu ba fatin sira ne’ebé sai risku boot ba asediu seksual, diskriminasaun hasoru feto, labarik no ema ho defisiensia bele akontese hanesan iha trasporte publiku laran, toilet, servisu fatin, aulas eskola, terminal merkadu, jardin no dalan publiku sira. Ohin ita halo iha fatin publiku sira ne’e atu konsola feto maluk sira bele deskobre problema siguransa ne’ebé sira hasoru hodi hetan solusaun hamutuk”