Rede Feto Timor Leste ohin Sexta-feira, 01 Dezembru 2023 Selebra Kampaña Loron 16 Ativizmu Kontra Violénsia Hasoru Feto no Labarik Feto, ne'ebé ho Tema Nasionál :" Hamutuk Investe iha Familia Hodi Prevene Violénsia Hasoru Feto no Labarik Feto. Atividades ida ne'e hala'o iha Suku Kaimauk, Postu-Administrativu Turiskai, Munisípiu Manufahi.Relasiona ho atividades no sorumutu ne'e, Presidente Konsellu Diretoria Rede Feto Timor-Leste halao Diálogo konaba Papel Familia iha prevensaun Violência Bazeia ba Jeneru (VBJ) no iha Dialogo ne Presidente Rede Feto Timor-Leste Sra. Zelia Fernandes iha nia intervensaun hateten katak, Prevensaun lolos husi Papel Familia nian maka, hahu husi inisiu Kultura ne’ebe Beiala sira halo, to ohin loron ita kontinua hatutan Ezemplu: Iha uma lisan iha Odamatan no Ai-Riin Feto no Mane hanesan mos familia iha Feto no Mane katak la iha desigualdades iha familia. Husi ne’e Representante suku Sr. Eduardo Quintão hateten katak Iha Suku Kaimauk familia sira, menus koñesimentu ba iha asuntu violência kontra feto no labarik feto, nia mos akresenta tan katak Edukasaun Laos deit iha Eskola maibe Edukasaun hahu kedas husi Familia katak Familia nia papel lolos maka hakmaan koñesimentu moral ba prevensaun violénsia sira hotu.Iha biban hanesan partisipantes sira mos hato'o sira nia preokupasaun ba númeru kazu violénsia hasoru Feto ne’ebe kontinua aumenta no preokupasaun ba trata certifikadu identidade. Nune’e partisipantes mos hato'o rekomendasaun ba partes relevantes, atu kontinua halo sosializasaun, atu nune'e Familia no komunidade sira bele iha koñesimentu diak no bele hamenus violénsia iha familia.Husi atividades refere, observasaun husi ekipa hatudu katak komunidade iha Suku Kaimauk, Postu-Administrativu Turiskai, Munisípiu Manufahi hamutuk ho Autoridade Lokál sira antusiasmu ho atividades ida ne'e, tanba liu husi atividades ne'e bele aumenta komunidade no familia sira nia koñesimentu diak liu tan iha sosiedade.Atividades ida ne'e, hetan apoiu fundus husi Sekretaria Estadu Igualdade Inkluzaun (SEII).